Laudatio zue 5 Joor Raphael Immoos im aob
Liebe Raphael,
es isch bigoscht scho fimf Joor här,
das wirgglig z glaube fallt mer schwär,
doch, doch, syt fimf Joor, s muess soo syy,
bisch Du bim aob derbyy.
Als Chef d‘ Orchestre – gar nie grob –
fiehrsch Du uns vo Prob zue Prob.
Duesch mit uns musikalisch schaffe,
duesch fescht in d Partuure gaffe,
duesch fir uns d Noote zämmeraffe,
dänggsch eventuell mänggmool an …Zolli…
und schwingsch mit Vehemänz – toc-toc –
und Effiziänz Dyy Taggt-Strich-Stogg…
Saisch de Blööser ohni Gschyss:
„Spiilet anstatt ges e fis“,
riefsch zwischenyyne zue de Bratsche
sy solle nit so ummelaatsche,
und rootsch de Gyyge, dasch nit dumm.
„wie wär‘s mit Collophonium ?“
Machsch au mit allne, das isch z loobe,
mänggmool am Aafang vor de Proobe
Schritt fir Schritt und Doon for Doon
Iebige fir d Intonatioon,
und hoffsch, s ghey niemerts uus de Fuege
und ass mir immer fiire luege…
De ryssisch als bekannte Maa
Beglaitige vo Chorwärgg aa
und luegsch, ass s aob, s macht Sinn
und syyg fir d Kasse schyynts e Gwinn,
ass mir dert bi de „Vacherin-Senne“
d CARMINA BURANA hänn spiile kenne.
Du bisch – fir das wänn mir hitt dangge –
fir uns nit numme in Gedangge,
Du bisch fir uns – esoo solls syy –
mit Häärz und Lyyb und Seel derbyy
und ziehsch – au wenn als uff der Schnuure –
dä „muusikalisch Waage“ duure.
Au sunscht bisch kummlig s ganze Joor
mit Dyyner Maiche in de Hoor,
bisch hyyslig und hesch, das han ych noonig,
dehaim vier Fraue in der Wohnig,
und was fir Dii ganz bsunders isch:
am liebschte issisch Dintefisch…
Buure-Reegle:
Mir winsche Dir – mit Huut und Hoor –
no ganz e Huffe aob-Joor
und winsche Dir vyyl Freud und Muet
ganz noonem Motto: S kunnt scho guet.
Schuuflebuur, im Novämber 2005