LAUDATIO
Liebe Raphael, loss Dir saage:
mir kennen ys wirgglig nit beklaage,
ass Du bi uns als Dirigänt,
mit Lächle, Aerm, Bai, Fiess und Händ…
… unser Orcheschter dirigiersch,
duur schwiirigi Passage fiehrsch,
und Dii fürs Gfühl au nit geniersch
und s allewyyl uffs Neu probiersch…
… drotz allem, wo nit lauft wies soll…
… mir andere findes au nit toll,
ass e gwissi Persoon, wo mir doo kenne,
ych wott jetz kaini Nämme nenne…
… kurz vor der Hauptproob in letschter Sekunde
ins Nirwana isch verschwunde…
Si muess an e Hochzyt – ych dänng fir mii:
s isch hoffetlig nit ihri aigeni gsi …
Buure-Reegle:
Das kunnt scho guet, ych mach e Wett,
well der Raphael Närve wie Drohtsail het !
Au bikemme mir gwissi Mussorgsky-Noote
s erscht Mool am letschte Mändig in d Pfoote,
und spiile drum hitt mit Mumm und Muet,
jä, im Blatt-Spiile sinn mer nämmlig guet…!
Du gisch uns der Yysatz, mir gänn uns Mieh,
mänggmool muesch stosse, mänggmool zieh,
und gheyt dä „Bydlo“ fascht uus de Fuege,
muesch nur dääne Oggse in d Auge luege…!
Buure-Reegle:
Das kanner guet, das macht en froh,
das mache die in der Innerschwyz immer esoo…
Wär ych hitt zoobe s erschtmool doo,
wurdsch vo mir der Drohtsail-Orde bikoo,
aber – und das isch wältbekannt –
hängge bi Dir dehaim schon e Huffe an der Wand.
Ass Dyyni Drohtsail nit dien roschte
bikunnsch – das isch kai dyyre Poschte –
vo mir als gscheyte Bhaltis myseel
zem Schmiire e Fläschli Olyyve-Eel.
Buure-Reegle:
Sott ebber ander e Roschtschutz-Mittel spände
kasch s Eel immer no an Salat verwände.
Schuuflebuur, 1. Meerze