Liebe Peter,
als Presidänt vom aob,
het me Dii lang, lang wirgge gseh,
hesch zwölf Johr, mir sinn ganz griehrt
s Orchescher organisatorisch gfiert…
… hesch Sitzige abgmacht, Sitzige glaitet,
und alles ganz gnau vorberaitet,
umfassend, exakt und ohni Gschichte,
hesch uns au gmahnt an unsri Pflichte…
… hesch Schryybe gschriibe, Probeplään,
(bisch insgehaim e Bratsche-Fän),
hesch alles grichtet ohni z bogge
mit Dyym Humor – dä syg schynts drogge…
… Du luegsch fir all’s, do simmer froh,
hesch nyt em Zuefall iiberloh…
wenn ebber uus-styygt, duesch nie flueche
kurzfrischtig gohsch Ersatz go sueche…
Gits lyychti Lämpe, loosisch zue,
es bringt Di gar nyt uus der Rueh,
wirsch bim greeschte Grach nie schwach,
denn s goht um d Muusig, also um d Sach !
* * * * *
Jä, musikalisch duesch nit pfuuse,
als erschti Gyyge kunnsch gross uuse,
schliessig isch, s fallt au uff Dii,
jo schon e Muusiglehrer gsi…
Als Biebli bisch e ganz e liebe,
kai Wässerli hesch kenne triebe,
doch wo kemme die Wörter häär ??
das sait schynts als Dy Teddybär…
Als Ehemaa bisch uffmerggsam,
bringsch Dyyner Frau nit Tärtli mit Rahm,
machsch, das macht chemisch gseh au Sinn,
Sunnecréme mit Anti-Mugge-Mittel dinn…
Au technisch gseh bisch zimmlig duure,
kaufsch zwei kabutti Velo, naimeduure
wottsch ains druus mache, das fahri vyyl schnäller,
jetz stehn halt zwai Velo-Lyyche im Käller….
* * * * *
An allne Proobe find’t me Dii
– au das Verhalte isch fir mii
nit numme logisch oder lässig –
es isch vor allem zueverlässig !
Nur aimool bisch, kaan ych mi bsinne,
e bitz verschrogge (ohni z spinne):
zem 100-ste Geburtstag vom Orchescher,
kenntsch maine, es sygi erscht grad geschter…
…gsi, wo dä Event passiert isch,
was uff der homepage dokumentiert isch…
Der Tschudi – domools Regierigsroot –
spändet dausig Fränggli – do wirsch grad rot…
Buure-Reegle:
no zwölf Jöhrli aob
hätt ych kaini Höörli meh…
Jetz liebe Peter, darfsch als Lohn
au im aob in Pension.
S kunnt s Marlies Börlin – allem aa
ischs si au aini vo der Muttenzer Mafia…
Und zem Schluss no 2 Värs in der typische Form vom Peter:
Limericks:
Wenn s der Peter bi der Nochfyyr als richtet
und bim Dangg in der Aasprooch denn dichtet,
wenn er sait, was är wott
und findets no flott,
gits e Limerick – so het me mir brichtet.
Der Peter Bloch, dä syygi
was är im Gsprööch gärn verschwyygi
doch ischs em halt laider passiert:
als Chemiker bisch pensioniert…
kasch froh sy, bisch nümm in der CIGY…
dichtet und vordrait an der GV vom aob am 22.9.08
vom Klarinette-Regischter